मान्छेको मन

काँच भन्दा कमजोर

फूलभन्दा सुन्दर

घामभन्दा घमाइलो

एउटै त रहेछ यहाँ

मान्छेको मन !!!

यहाँ स्पर्श बेगरै

मान्छेको मन

काँचजस्तै टुक्रिन्छ छरपष्ट

तिम्रो मनको निश्वार्थ मायाले

फूलभन्दा सुन्दर हुन्छ मान्छेको जीवन

मगमगाउन थाल्छन् तिमीले रोपेका प्रेम फूलहरु

मायाको रापिलो घाम यसरी फैलिन्छ

जहाँ सूर्य स्वयं बन्दी बन्छ,

रातभरी लत्रक्क परेका

मान्छेका मनजस्तै वृक्षका पातहरु

जसरी निमेषभरमै चम्किन्छन् घामको एक चुम्बन पाएर

त्यसरी नै चम्किन्छन्, मान्छेका मनहरु

तिम्रो निश्वार्थ प्रेममा

यही मन हो ,

जसले युद्ध जित्छ, संसार हाँक्छ,

यही मन हो

आखाँभरी टिलपिल आँशु पारेर रोइदिन्छ !!!

Advertisements